NA MWANDISHI WETU
WAZIRI wa Viwanda na Biashara Mhe. Dkt. Ashatu Kijaji ametoa wito kwa wanawake wa Tanzania kushiriki Kongamano la Pili la Wanawake katika Biashara chini ya Mkataba wa eneo huru la Biashara Afrika ( AfCFTA) litakalofanyika tarehe 06 hadi 08 Disemba, 2023 katika Kituo cha Mikutano cha Kimataifa cha Mwalimu Julius Nyerere (JNICC) Jijini Dar es Salaam kwa kujisajili kupitia anuani ya tovuti hii https://au-afcfta.org/wit/ au Tovuti ya Wizara ya Viwanda na Biashara ambayo ni www.viwanda.go.tz.
Ameyasema Novemba 29, 2023 akiwa na Katibu Mkuu wa Wizara Dkt. Hashil Abdallah alipokuwa akiongea na waandishi wa Habari Jijini Dar es Salaam kuhusu Kongamano hilo linaloongozwa na Kauli Mbiu "Kuimarisha Ushiriki wa Wanawake katika Biashara na Kuongeza Kasi ya Utekelezaji wa AfCFTA” ambapo Tanzania itakuwa mwenyeji.
Vilevile, Amebainisha kuwa Kongamano hilo linalenga kuwakutanisha pamoja wanawake katika biashara kujadiliana, kubadilishana uzoefu na kutatua changamoto wanazokabiliana nazo katika biashara ili kuwawezesha wanawake kuweka mikakati ya kuimarisha ushiriki wao kwenye biashara ndani ya Afrika chini ya Mkataba wa AfCFTA na kuwawezesha kunufaika ipasavyo na fursa za biashara zinazopatikana na Mkataba wa AfCFTA ili kuongeza ajira na kukuza uchumi imara kwa Taifa na Jamii kwa ujumla.
“Wanawake ndio kiini cha biashara na wamekuwa chachu muhimu katika maendeleo ya uchumi duniani, hivyo wanatakiwa kujumuishwa ili kuchangamkia fursa zinazotolewa chini ya Mkataba huo “. Amesema Dkt. Kijaji
Akizungumuzia kuhusu washiriki wa Kongamano hilo amesema washiriki wapatao 700 wanatarajiwa kushiriki ambao ni pamoja na Viongozi mbalimbali wanawake kutoka Barani Afrika na Nje ya Afrika katika ngazi ya Marais, Marais Wastaafu, Makamu wa Rais, Mawaziri Wakuu, Wakuu wa Taasisi mbalimbali za Kimataifa, Watu Mashuhuri, Mawaziri wanaosimamia sekta ya biashara na masuala ya jinsia na wanawake, vijana na wafanyabiashara. Sambamba na Kongamano hilo, kutakuwa na maonesho ya wafanyabiashara yatakayohusisha wafanyabiashara wanawake kutoka katika nchi 55 za Afrika.
Aidha amesema, Kongamano hili la Wanawake katika Biashara chini ya Mkataba wa Eneo Huru la Biashara Afrika, ni Kongamano la pili kufanyika ambapo Kongamano la Kwanza lililofanyika tarehe 12-14 Septemba 2022 Jijini Dar es Salaam ambalo lilihudhuriwa na washiriki wapatao 1060 kutoka nchi mbalimbali za Afrika wakiwemo viongozi wananwake katika ngazi mbalimbali. Kongamano hilo lililenga kuwakutanisha Viongozi Wakuu Wanawake, Mawaziri, Wanawake Wajasiriamali na wadau wengine ili kujadili, kutoa maoni, ushauri na mapendekezo ya kuwezesha uandaaji wa Itifaki kwa ajili ya kuwawezesha Wanawake na Vijana kushiriki kikamilifu katika biashara ndani ya AfCFTA.
Vilevile amebainisha mafanikio makubwa yaliyotokana na Kongamano la kwanza la mwaka 2022 ikiwa ni pamoja na kufanikiwa kupata maazimio yaliyowezesha kuandaa na kukamilisha Rasimu ya Itifaki ya Wanawake na Vijana katika Biashara ndani ya AfCFTA ambayo kwa upande wa Tanzania iko katika hatua mbalimbali za kuridhiwa ili iannze kutumika nchini
Pamoja na kufanikiwa kwa itifaki hiyo, Kongamano hilo lilitoa njia sahihi za kutatua vikwazo na changamoto mbalimbali zinazowakabili wanawake na vijana katika biashara ili kuwawezesha kushiriki kikamilifu katika biashara barani Afrika, ikiwa ni pamoja na upatikanaji mdogo wa fedha, taarifa za masoko, pembejeo, matumizi ya teknolojia, masoko, uwezo mdogo wa kufuata viwango na mahitaji mengine ya kisheria. Amesema Dkt. Kijaji.
Dkt Kijaji pia amesema mafanikio hayo yanajumuisha Kampuni 18 zinazofanya biashara ya kuuza bidhaa katika soko la AfCFTA yakiwemo makampuni ya wanawake ya ANISIA Group (Tanzania) linalouza bidhaa za karafuu nchini Morocco na AJA (T) Ltd linalouza Kamba za katani nchini Ghana. Makampuni haya yanatimiza lengo la Tanzania kuwa miongoni mwa nchi nane (8) za mwanzo zilizopewa kipaumbele cha kupeleka bidhaa 10 zitakazotangulia kuingia katika soko hilo kuanzia Julai Mosi 2023.
Aidha, amewasisitiza wananwake kushiriki wa katika kuimarisha mnyororo wa thamani katika bidhaa, hasa kilimo na misitu na kuuza bidhaa zao kupitia soko la AfCFTA.
Tanzania ni mojawapo ya nchi ambazo tayari zimesharidhia Mkataba huo. Baraza la Mawaziri lilipitisha Waraka wa kuridhiwa kwa Mkataba huo tarehe 7 Agosti 2021 na Bungeni la Jamhuri ya Muungano wa Tanzania likapitisha rasmi Azimio la kuridhia Mkataba huo mnamo tarehe 9 Septemba 2021.
Waziri wa Viwanda na Biashara Mhe. Dkt. Ashatu Kijaji akizungumza na waandishi wa habari leo Novemba 29,2023 Jijini Dar es Salaam kuhusu Kongamano la Pili la Wanawake katika Biashara chini ya Mkataba wa eneo huru la Biashara Afrika ( AfCFTA) litakalofanyika tarehe 06 hadi 08 Disemba, 2023 katika Kituo cha Mikutano cha Kimataifa cha Mwalimu Julius Nyerere (JNICC) Jijini Dar es Salaam
Waziri wa Viwanda na Biashara Mhe. Dkt. Ashatu Kijaji akisisitiza jambo wakati akizungumza na waandishi wa habari leo Novemba 29,2023 Jijini Dar es Salaam kuhusu Kongamano la Pili la Wanawake katika Biashara chini ya Mkataba wa eneo huru la Biashara Afrika ( AfCFTA) litakalofanyika tarehe 06 hadi 08 Disemba, 2023 katika Kituo cha Mikutano cha Kimataifa cha Mwalimu Julius Nyerere (JNICC) Jijini Dar es Salaam
Waziri wa Viwanda na Biashara Mhe. Dkt. Ashatu Kijaji akizungumza na waandishi wa habari leo Novemba 29,2023 Jijini Dar es Salaam kuhusu Kongamano la Pili la Wanawake katika Biashara chini ya Mkataba wa eneo huru la Biashara Afrika ( AfCFTA) litakalofanyika tarehe 06 hadi 08 Disemba, 2023 katika Kituo cha Mikutano cha Kimataifa cha Mwalimu Julius Nyerere (JNICC) Jijini Dar es Salaam
Katibu Mkuu wa Wizara ya Viwanda na Biashara
