.jpeg)
Rais wa Ukraine, Volodymyr Zelenksy ameomba kuhutubia Umoja wa Afrika (AU) kutokana na vita vinavyoendelea nchini humo ili kuwaeleza Waafrika jinsi vita hiyo itakavyo athiri Dunia.
Akithibitisha mazungumzo hayo Mwenyekiti wa AU, Macky Sall ambaye pia ni Rais wa Senagal amesema ombi hilo limekuja baada ya kuwa na mazungumzo na Zelenksy kuhusu madhara ya kiuchumi yatakayotokea kutokana na vita vinavyoendelea Ukraine.
Rais Zelensky alimpigia simu Rais wa Senegal Macky Sall jana Jumatatu April 11, 2022 na mazungumzo yao yaligusia taarifa ya AU mwezi Februari iliyotaka kusitishwa mara moja kwa mapigano na kurejelewa kwa mazungumzo.
Katika mazungumzo hayo ya simu, Bw Zelensky alimfahamisha Bw Sall kuhusu "mapambano ya Ukraine dhidi ya uvamizi na uhalifu wa kutisha wa mchokozi wa Urusi", kulingana na ujumbe wa Twitter.
Senegal ilikuwa miongoni mwa nchi 17 za Kiafrika ambazo hazikupiga kura katika Umoja wa Mataifa kuhusu azimio la kutaka Urusi ikomeshe operesheni yake ya kijeshi nchini Ukraine.
